DSRC-- through my Eyes

މި ލިޔުން ޚާއްސަ މިކޮށްލަނީ ޑީ.އެސް.އާރް.ސީ އަށެވެ. އޭގެ ހަޔާތުން ވޭތުކުރި 5 އަހަރާ އޭގެ ކުރިއަށް އަޅުގަނޑުގެ ލޮލުން ބަލައިލެވޭ ބަލައި ލުމަކަށެވެ. 

އަޅުގަނޑުމެން އެންމެންނަކީ އެކުގައި ކުޅިސަމާސަ ކުރަން އުޅުނު ކުދި ބަޔަކީ މެވެ. އުމުރުން އެންމެ ދޮށީ މީހަކަށް ހުންނާނީ އަޅުގަނޑެވެ. އަޅުގަނޑުގެ އުމުރުން ބާރަ ނުވަތަ ތޭރަ ވަރަކަށް އަހަރެވެ. އެދުވަސްވަރަކީ ރަށުގައި ތިބެގެން ރަނގަޅު ތަޢުލީމެއް ލިބެން އޮތް ދުވަސް ވަރެއް ނޫނެވެ. އެހެންކަމުން ގިނަ ކުދިން ތަކެއް ރަށުން ބޭރަށް ކިޔަވަން ދިޔަ ދުވަސް ވަރެކެވެ. އަޅުގަނޑުވެސް ކިޔަވަމުން ގެންދިޔައީ ބ.އޭދަފުށީގައެވެ. އެންމެ ގާތް މީހަކަށްވެސް ހުރީ ވާލިދުއެވެ. އޭނަވެސް މާގިނަ ދުވަސް ތަކެއް ނުވެ އޭދަފުށި ދޫކުރިއެވެ. 

ކިޔަވަމުން ދިޔަ ދުވަސް ވަރުގެ ވާހަކަ އަކީ މި ލިޔުމުގެ މަޤްސަދު ކަމުގައި ނުވުމުން މި ލިޔުމުގެ އަސްލަށް ޖެހިލާނަމެވެ. އެއީ 1999 ވަނަ އަހަރުގެ ޑިސެންބަރެވެ. ރާއްޖޭގެ އެކި ކަންކޮޅުތަކުގައި ދިޔައީ އާ ސާސްކަފަށް ތައްޔާރު ވުމުގެ ގޮތުން އެތަށް ކަމެއް ރާވަމުން ނެވެ. އެގޮތުން ކެންދޫގައިވެސް ކުރާނެ ކަންތައްތަކެއް އިސް ފަރާތް ތަކުން ދިޔައީ ނިންމަމުން ނެވެ. އެގޮތުން ނިންމުނު އެއް ކަމަކީ ދެކޮޅު ވާދައަށް ފުޓްބޯޅަ މެޗެއް ކުޅުމެވެ. އެވެސް އަޅުގަނޑުމެންގެ އުމުރުގެ ކުދިންގެ މެދުގައެވެ. އެކަން ވެގެން ދިޔައީ އެންމެންނަށް ވެސް ލިބުނު ވަރަށް ބޮޑު އުފަލަކަށެވެ.

އަޅުގަނޑުގެ ނިސްބަތްވަނީ އިރުމައްޗަށް ކަމަށް ވިޔަސް އެކުގައި އުޅެނީ ހުޅަނގު ކޮޅު ކުދިން ކޮޅެވެ. އެހެންކަމުން ކޮންމެ ގޮތެއްވިޔަސް ކުޅެން ނިންމީ ހުޅަނގު ކޮޅަށެވެ. ކުޅެން ނިންމީ އޭ ބުނި ކަމުގައި ވިޔަސް އޭރު ވެސް މިހާރުވެސް އަޅުގަނޑަކީ ކުޅެން މާ މޮޅުމީހެއް ނޫނެވެ. ތަނބެއް ދަނޑުމަތީ ގައި ބެހެއްޓުމުން ވާނެ ފައިދާ އަޅުގަނޑު ކުޅެގެންވެސް ވާނެއެވެ. އެވެސް ވާނީ ކުޅުމައްތާ ދޯއެވެ! އެހެންވެ ކުޅެން ބޭނުންވާ ވާހަކަ ލިޔެލީއެވެ.

2000 ވަނަ އަހަރު ފެށެން ވަރަށް ކައިރި ވެފައި ވަނިކޮށް އެއްދުވަހު އިބްރާހިމް އަބްދުއްރަޙްމާން ( އިބްރާ، އިއްބެ، އޮގަރު) އައިސް ވަރަށް ދެރަވެފައި އޮފީހަށް ފޮނުވި ލިސްޓްގައި އޭނަގެ ނަމާ އަދިވެސް އެހެން ދެތިން ކުއްޖެއްގެ ނަން ނެތް ވާހަކަޔާ އެއީ އެންމެ ރަނގަޅު ގޮތް ނޫން ކަމަށް ބުންޏެވެ.  "އިއްބެ ބުނި ކަމުގައިވިޔަސް އެއީ ތެދެކެވެ. އަޅުގަނޑު ޓީމް ލިސްޓްގައި ނުޖެހިޔަސް އިއްބެ ޖަހަން ޖެހޭނެއެވެ. އޭނަ އަކީ މޮޅަށް ކުޅޭ މީހެކެވެ. އަނެއް ކޮޅުން މިމެޗުން ހުޅަނގު އެއް ގޮތަކަށްވެސް ބަލިވާކަށް ބޭނުމެއް ނޫނެވެ." މިއީ އަޅުގަނޑުގެ ހިތަށް އެރިހާ ބަނދިވަރު ތަކެވެ. 

އެލިސްޓް ލިޔުނު ކަމުގައި ބުނާ އަޙްމަދު މުޙައްމަދު (ކޮރެއާ) އާ ބައްދަލު ކުރަން ދިޔައީ މެވެ. ވަރަށް ވެފައި އެވެ. އެކަން މިހާރު ހިތަށް އަރާ ހިނިވެސް އާދެއެވެ. އޭނާ ގާތުން އެނގުނު ގޮތުނގައި ނަންތަކެއް ޖަހާލާފައިވާ ގަނޑެއް އޮފީހަށް ދިނީއެވެ. އޭނާ ކައިރީ އެވޭހޭ ޓީމް ލިސްޓަކަށް އަދި އަމުދުން އެއްބަޔަކު މަދުން ޖަހައިގެން ޓީމަކަށްނުވާނޭ އެ ލިސްޓް އޮފީހުންނަގާ އެއަށް ބަދަލު ގެންނަން ބުނީމެވެ. އަޅުގަނޑުމެންގެ އުނދަގޫ ބޮޑުވުމުން އޭނާ އެކަމަށް އެއްބަސްވެ " ކަލޭމެން ބޭނުން ގޮތެއް ތިޔަށް ހަދާ. މަނެތިން އޮފީހުން އެގެނެސްގެން ތިބުނާ ބަދަލެެއް ގެންނާކަށް" މިހެން ބުންޏެވެ. 

ވީ އެންމެ އަވަހަކަށް އޮފީހާ ދިމާލަށް ދުއްވައިގަތީމެވެ. އޮފީހަށް ގޮސް އަބްދުﷲ އަލީ ( އެއްގަމުގެ އަބޯ) އަތުން އެލިސްޓް ނަގައި އެއަށް ވުރެ ފުރިހަމަ ލިސްޓެއް ގެންނަން ކަމަށް ބުނެ ދުއްވައިގަތީމެވެ. އޭރު އެކަމުގައި އިސްކޮށް ތިބީ ނުވަ ކުއްޖެކެވެ. އެއީ އަސަދުﷲ އަލީ (އަސޭ)، އަޙްމަދު މުޖުތަބާ (މުޖޭ)، އާދަމް އަބްދުއްރަޙްމާން(ޑޮނާޑް)، އަބްދުﷲ ޖަމާލް، މުޙައްމަދު އާދަމް (މޯޑް)، އިއްބެ، ވާލިދު އިދުރީސް (ވޯލްޑް)، އަސްފަރު އަލީ (އައްޕަރޭ) އަދި އަޅުގަނޑެވެ. ވަރަށް ގިނަ ބަހުސް ތަކަކަށް ފަހު ޓީމަށް ކިޔާނެ ނަމެއް ކަނޑައެޅުނެވެ. ޓީމްގެ ނަމަކަށް "ޑައިމަނޑް ސްޕޯޓްސް" ދިނުމަށް ފަހު މެނޭޖަރަކާއި އޮފިޝިއަލުން ކަނޑައަޅާ ޑައިމަންޑް ސްޕޯޓްސް ވުޖޫދަށް ގެނެވުނެވެ. ފުރަތަމަ މެނޭޖަރަކަށް އަޅުގަނޑު ވުމުގެ ޝަރަފާއެކީ އެވެ. އަދި އިސްކޮށް އުޅުނު ނުވަ މީހުން ނަކީ ފައުންޑަރ މެމްބަރުން ކަމުގައި ކަނޑައަޅާ އޮފިސިއަލް ކޮށް "ޑައިމަންޑް ސްޕޯޓްސް" އުފެދިގެން ދިޔައީ 2000 ވަނަ އަހަރުގެ ޖެނުއަރީ މަހުގެ ފުރަތަމަ ދުވަހު އެވެ. ކެންދޫގެ ތާރީޚްގައި އާޓީމެއް އުފެދިގެން ދިޔައީ އެވެ.

އިރުމަތީ ކޮޅުގެ ޓީމަށް އެމީހުން ދިން ނަމަކީ ބީ.އެލް.ޓީ ( ބެސްޓް ލިޓްލް ޓީނޭޖާސް) އެވެ. ވަރަށް ފޯރިގަދަ ތާރީޚީ މެޗެއް އެދުވަހުގެ ހަވީރު ކެންދޫ ފުޓްބޯޅަ ދަނޑުގައި ކުޅެވިގެންދިޔައެވެ. އެ ތާރީޚީ މެޗް ފަޚްރުވެރި ކަމާއެކު ކާމިޔާބް ކުރީ ޑައިމަންޑް ސްޕޯޓްސް އެވެ. ޓީމްގެ މެނޭޖަރަކަށް ވުމުގެ ސަބަބުން ޓީމްގެ އެންމެ އިސްމީހެއްގެ ގޮތުން ހަރަކާތް ތެރިވާން ޖެހުނީ އަޅުގަނޑަށެވެ.

އޭދަފުށީގައި އުޅުނު ދުވަސްވަރު ފާހަގަވި އެއްކަމެއް އޮތެވެ. އެރަށުގެ ހުރިހާ އުމުރު ފުރާއަކަށްވެސް މުބާރާތް ތަކުގައި ކުޅުމުގެ ފުރުޞަތު ލިބޭކަމެވެ. ކެންދޫގައި ސްކޫލް އުމުރު ފުރައިގެ ކުދިންނަށް ހުޅުވާލެވިފައި އޮންނަނީ އެންމެ މުބާރާތެކެވެ. އެއީ ސްކޫލް އިންޓަރ ހައުސް މުބާރާތެވެ. އެހެން ކަމުން ކެންދޫގައި އެފަދަ ކަމެއް ކުރުމަށް އަޅުގަނޑު ނިޔަތް ގަތީމެވެ. ފުރަތަމަ އަމިއްލަ ނަމުގައި މުބާރާތް ބާއްވަން ހިތުލީމެވެ. އެހެން ނަމަވެސް އެއީ މާ އަމިއްލަ އެދުން ބޮޑު ގޮތެއް ކަމުގައި ފެނުނު ހިނދު ޓީމުގެ ނަމުން ނަންދީ މުބާރާތް ބާއްވަން ނިންމާ އެކަން އެންމެންނާ ހިއްސާ ކުރީމެވެ. އެންމެންވެސް އެކަމަށް މަރުހަބާ ކިޔެވެ. އަދި މުބާރާތަށް "ޑައިމަނޑް ކަޕް" ގެ ނަން ދިނީމެވެ. އެ މުބާރާތަކީ 18 އަހަރުން ދަށުގެ ކުދިންނަށް ހުޅުވާލެވިފައިވާ މުބާރާތެކެވެ.

މުބާރާތަށް ތައްޔާރު ވުމުގެ ގޮތުން ދޭނެ ސެޓްފިކެޓްތައް ކަނޑައަޅާ އެ ތައްޔާރު ކުރުމުގެ މަސައްކަތް ބ.އޭދަފުށީ ތާރިޤް އަބްދުއް ރަޙްމާން ގެ އެހީތެރިކަމާއެކު ކުރީމެވެ. އޭރު އެއީ ހާދަ ހާވާ ބުރަ ދުވަސްވަރެކެވެ. ސެޓްފިކެޓްގެ ލިޔުންކޮޅު ޕްރިންޓްކޮށް، ބިސްމި ޕްރިންޓްކޮށް ބޯޑަރެއްލީ ވަކި ވަކިންނެވެ. އެކަމަކުވެސް އޭރަށްބަލާއިރު އެއީ ވަރަށް ފުރިހަމަ ސެޓްފިކެޓެކެވެ.

މުބާރާތުގައި ތިންޓީމަކުން ބައިވެރިވިއެވެ. އެއީ ޑައިމަންޑް ވެސް ލައިގެންނެވެ. ޗެމްޕިއަންޓީމަށް ދިނީ ނޫޑްލީސް ކޭހެކެވެ. ރަނަރަޕް ޓީމަށް ކޭހެއްގެ ދެބައިކުޅަ އެއްބައެވެ.ފުރަތަަމަ ޑައިމަނޑް ކަޕްގެ ޝަރަޕްވެރި މެހްމާނަކީ ނަސްރުﷲ އަލީއެވެ. ނަސްރުގެ ހެޔޮ ބަސްތަށްވީ ކުރިއެރުމަށްވި ބާރަކަށެވެ. އަދި ބައެއް މީސްމީހުން އުކި ގަޅި ބަސްތަކަކީވެސް ކުރިއެރުމަށް ލިބުނު ބާރަކަށެވެ.

ޓީމް ހިންގަމުން އައީ އެފަދަ ދުވަސް ވަރެއްގައި ހިންގޭނެ އެންމެ ފުރިހަމައަށޭ އަޅުގަނޑު ކެރި ހުރެ  ބުނަން ކެރެއެވެ. ހުރިހާ ބާރެއް އޮންނަނީ އަޅުގަނޑުގެ އަތުގައެވެ. އަޅުގަނޑު ނުރުހޭ ކަމެއް ކޮށްފިނަމަ އެ ކުއްޖަކު ޓީމުން ވަކި ކުރީމެވެ. އެވެސް ބޮޑަކަށް ހުންނަ މީހެއްގެ ބަސް އެއްސުމުމުގެ ގޮތުންނެވެ. އެހެންނަމަވެސް ޓީމް އުފެއްދުމުގައި އުޅުނު ވޯލްޑް ވަކި ކުރެވުނު ހިސާބުން އަޅުގަނޑުވެސް އެގޮތް ބަދަލު ކުރަން ނިންމީމެވެ. އާއްމު ގަވައިދެއް ހަދާ ކޮންމެ އަހަރަކުވެ ސިއްރު ވޯޓަކުން އައްޔަން ކުރާ މަގާމު ތަކެއް އުފެއްދީމެވެ. އެއިން ކޮންމެ މަގާމަކަށް ޓީމްގެ ކޮންމެ މެމްބަރަކަށް ކުރިމަތިލެވޭ ގޮތް ހެދީމެވެ. ކޮންމެ ކަމެއް ނިންމުމުގެ ކުރިން ހުރިހާ މެމްބަރުންނާ މަޝްވަރާ ކުރަން ފެށީމެވެ. މިހާރުގެ ގޮތަށް ބުނާނަމަ ވަރަށް ފައްކާކުރަނިވި ޑެމޮކްރެސީއެއް ޓީމަށް ގެނައީމެވެ. ޓީމްގެ މީޓިންގ ތައް ބާއްވަމުން ދިޔައީ ރަށުގެ އެކި ތަންތަނުގައެވެ. މިގޮތުން ޓީމް ކުރި އަރަމުން ދިޔައީ ހީކުރި ވަރަށް ވުރެވެސް ބާރަށެވެ.

މުބާރާތް ހިންގުމަށާ ޓީމް ހިންގުމަށް ބޭނުންވާ ފައިސާ ހޯދީ އެކި އެކި މަސައްކަތް ކޮށްގެންނެވެ. ގާއެޅުމާއި ވެލި ގެނައުމާއި ވަޅުދިޔަ ހިއްކުން ފަދަ އެތައްކަމެއް ކުރީމެވެ. ކިޔެވުމަށްފަހު ލިބޭ ބަންދުގެ ގިނަދުވަސް ތަކުގައި ދިޔައީ ޓީމަށް އެއްޗެއް ހޯދުމަށް މަސައްކަތް ކުރަމުންނެވެ. މިކަމުގައި ޓީމްގެ އެންމެހާ މެންބަރުން ގެންގުޅުނެ އެކުވެރިކަން ފާހަގަ ކުރަމެވެ. ޓީމް މިގޮތަށް ކުރިއަރާ މުބާރާތް ކުރިއަރަމުން ދިޔަ ވަރަކަށް މެމްބަރުންގެ ޚިޔާލުވެސް ދިޔައީ ތަރައްޤީ ވަމުންނެވެ. މިވީހާ ތަނަށް އައި އިރު ދެތިން އަހަރެއް މެނުވީ އަޅުގަނޑު ހުރީ ޓީމްގެ އެންމެ އިސް މަޤާމްގައެވެ.

އޭރުގައި ތިބި އެންމެން ސްކޫލް ނިމުމުން ކްލަބެއްގެ ގޮތުގައި ރަޖިސްކުރުމަށްނިންމީ މެވެ. އަދި އެކަމަށް ތާރީޚެއްވެސް ކަނޑަ އެޅީމެވެ. އެންމެންވެސް މަސައްކަތް ކުރަމުންދިޔައީ ޓީމަށް އިތުރު ކުރިއެރުން ގެނައުމަށެވެ. ޓީމްގެ މެމްބަރުންގެ މެދުގައި އޮތީ ވަކި ނުކުރެވޭނެ ފަދަ ވަރުގަދަ އެކުވެރި ކަމެކެވެ. އެއީ ދެވަނަ އެއް ނެތް ފަދަ ބަދަހި ގުޅުމެކެވެ. މި ގުޅުން ވަރުގަދަ ވަމުން ދިޔަ ވަރަކަށް މެމްބަރުންވެސް ދިޔައީ އިތުރުވަމުންނެވެ. އެއީ ކުރިއަރަމުން އައި ކަމުގެ އެއް ހެއްކެވެ. ނޫޑްލީސް ކޭހުން ފެށި މީހުން ޓްރޮފީ އާއި މެޑަލް އަދި ކުލަ ސެޓްފިކެޓާ ހަމައަށް ދެތިން އަހަރުގެ ތެރޭގައި އައެވެ. މިއިން ކޮންމެ ކުރި އެރުމެއްގައި އަޅުގަނޑުގެ ޙިއްސާއެއް ވުމަކީ މިއަދު ލިބޭނެ އެންމެ ބޮޑު ހިތްހަމަ ޖެހުމެވެ.

ޑައިމަންޑް ސްޕޯޓްސް ގެ ހަޔާތުގައި ހިނގާ ދިޔަ ކޮންމެ ކަމަކީ ހިތުން ފުހެލަން އުދަގޫ ކަންތައްތަކެވެ. އެހެންނަމަވެސް ޚާއްސަ ކަންތައްތަކެއް ފާހަގަ ކޮށްލާނަމެވެ. ޖާޒީ ބައި ގަތުމަށްޓަކައި ފަސް މެމްބަރަކު މާލެ ކުރި ދަތުރަކީ ވަރަށް ޚާއްސަ ދަތުރެކެވެ. ރަށަށް ފުރައިގެންދިޔައީ އަމިއްލަ ޖާޒީ ބައެއް ހިފައިގެންނެވެ. ސެޓްފިކެޓްބަލާ އޭދަފުއްޓަށް ކުރެވުނު ދަތުރަކީވެސް ހަނދާނީ ދަތުރެކެވެ. މާސް ކަޕްގެ ޗެމްޕިއަންކަން ހޯދުމާ އަދި ދެންވެސް ދެވުނު ދަތުރު ތަކާ އެދަތުރުގައި ކުރެވުނުހާ ކަންކަން ދަރިންގެ ދަރިންނަށް ދަންދެން ހިތުގައި ބިންވަޅުނެގިފައި ހުންނާނެއެވެ.

ޑައިމަންޑް ސްޕޯޓްސްގެ ދަތުރުގަައި އަޅަންބޭނުންވި އެންމެ މުހިއްމު ފިޔަވަޅު ކަމުގައިވި ކްލަބެއްގެ ގޮތުގައި ރަޖިސްޓަރ ކުރުމުގެ ވަގުތު އައިސް ޖެހުނީ އެވެ. ވަރަށް ގިނަ ވާހަކަތަކަށް ފަހު އިސްވެ ދެންނެވިފައިވާ ނުވަ ފައުންޑަރ މެމްބަރުންގެ ބަދަލުގައި ނުވަމީހުން އިތުބާރު ކުރާ ދެމީހަކާ އެކަން ހަވާލުކޮށް އެދެމީހުންގެ ނަންމަތީ ރަޖިސްޓްރީ ކުރުމަށް ނިންމުނެވެ. އެ ދެމީހުންނަކީ ބ.ކެންދޫ ރާސްތާ މުޙައްމަދު އާޝާން އާއި ބ.ކެންދޫ ވާދީ ޖަޢުފަރުޞާދިގެވެ. އެދެމީހުންގެ މަސްއޫލުވެރިކަމުގައި "ޑަައިމަންޑް ސްޕޯޓްސް އެންޑް ރެކްރިއޭޝަން ކްލަބް   ( ޑީ.އެސް.އާރް.ސީ )" ގެ ނަމުގައި ޑައިމަންޑް ސްޕޯޓްސް ރެޖިސްޓަރ ކުރީމެވެ. އެހިސާބުން ހުޅުވިގެން ދިޔައީ މުޅިން އާ ސަފްހާއެކެވެ. ކެންދޫ ރައްޔިތުންނަށް ކުޅިވަރު ކުޅުމުގެ މަގުފަހި ކުރުމާ މުނިފޫހި ފިލުވުގެ ކަންކަން ތަޢާރަފްކޮށް ކެންދޫ އަކީ ކުޅިވަރުގެ ރޮނގުގަައި ނަން މަޝްހޫރު ރަށެއްގެ ގޮތުގައި ހެދުމަކީ މި ކްލަބްގެ އަމާޒެވެ.

ޑީ.އެސް.އާރް.ސީ ގެ އުމުރުން މިއަދު ފަސް އަހަރު ފުރުނު އިރު އޭގެ ޅަ ހަޔާތުގައި ވަނީ އެތައް ކާމިޔާބެއް ހޯދިފައެވެ. ޑައިމަންޑް ސްޕޯޓްސް އިން ފެށި ޑައިމަނޑް ކަޕްގެ 14 ވަނަ ކަޕް ވަނީ ބޭއްވިފައެވެ. މި ކަޕްގެ އިތުރުން ތިންމުގޯލި މުބާރާތަކާއި ބަށި މުބާރާތަކާއި ވަންޑޭ ކަޕްގެ 3 މުބާރާތާއި މަސްބޭނުމުގެ މުބާރާތެއް ވަނީ ބާއްވާފައެވެ. އަދި ކުރިއަށް އޮތް އަހަރު ތަކުގައި އިތުރު މުބާރާތްތަކާއި ކަންތައް ތަޢާރަފް ކުރުމަށް ވަނީ ނިންމާފައެވެ. އަދި މުބާރާތް ތަށް ފޯރިގަދަ ކުރުމުގެ ގޮތުން ދެވޭ އިނާމްތަށް ވަރުގަދަ ކުރުމަށް މެމްބަރުން ދަނީ ބާރު އަޅަމުންނެވެ. އަމިއްލަ ސައުންޑް ސިސްޓަމަކާއި އެތަކެއް ކުޅިވަރު ކުޅޭނެ ސާމާނު ކްލަބްގެ މިލްކިއްޔާތުގައި އެބަހުއްޓެވެ. ރަށުންބޭރުން ވެސް ވަރަށް ހަރަކާތް ތެރި މެމްބަރުން ތަކެއް ވަނީ އުފެދިފައެވެ.  ފަހަކަށް އައިސް އެހެން ކްލަބަކުން ބޭއްވި ފުޓްބޯޅަ މުބާރާތްވެސް ވަނީ ކާމިޔާބް ކޮށްފައެވެ. މެމްބަރުންގެ އަދަދު ވަނީ އިތުރުވެފައެވެ.

ފާއިތުވެގެން މި ދިޔަ ތޭރަ އަހަރަކީ އެތަކެއް ތަޖުރިބާއެއް ލިބިދިން ތޭރަ އަހަރެވެ. ހިތި އަދި ފޮނިން އެއްވެފައިވާ ތަޖުރިބާ ތަކެކެވެ. ފާހަގަ ކޮށްލަންޖެހޭ  ކަމަކީ މިއަދާ ހަމަ އަށްވެސް ކްލަބް އައިސްފައި މިވަނީ މެމްބަރުންގެ ބުރަ މަސައްކަތުންނެވެ. ކްލަބް ހިންގަމުން މިހާރު މިގެންދެވެނީ ކްލަބްގެ މެމްބަރުން ދާހިއްލައިގެން ލިބޭ އާމްދަނީ އިން ބައެއް ކްލަބަށް ހޭދަކޮށްގެންނެވެ. އަމިއްލަ ވަގުތާއި މާލު އެކަމުގައި ޤްރުބާން ކޮށްގެންނެވެ. ކުރިއަތް އޮތް ތަނުގައިވެސް ކްލަބް އެގޮތުންނަމަވެސް ހިންގުން އެއީ މެމްބަރުން ބޭނުންވާ ގޮތެވެ.

މިއަދު އަޅުގަނޑަކީ އާއްމު މެމްބަރަކީމެވެ. އެހެންނަމަވެސް ވަރަށް ފަޚްރުވެރިކަމާއެކު ބުނެލަން ބޭނުމީ 2012 ވަނަ އަހަރުގެ ހިންގާ ކޮމިޓީއަކީ މިހާތަނަށް ދުށް އެންމެ ވަރުގަދަ ކޮމިޓީއެވެ. ކޮމިޓީގެ ޗެއަރމަން މުޖޭ، ރައީސް އަސޭ ނައިބް ރައީސް އަބްދުﷲ ޝަރީފް، ދެ މުއައްސިސުން އަދި ކޮމިޓީގެ އެހެން މެމްބަރުންނަށް ހިތުގެ ފުންމިނުން ޝުކުރު ދަންނަވަމެވެ.  ޑީ.އެސް.އާރް.ސީ އަކީ އަޅުގަނޑުގެ ހަޔާތުގެ އެއްބައެވެ. އަޅުގަނޑާ  ޑީ.އެސް.އާރް.ސީ އާއި ދެމެދު އޮންނަނީ ލޭގެ ގުޅުންފަދަ ވަރުގަދަ ގުޅުމެކެވެ. ޑީ.އެސް.އާރް.ސީ އަށް ދެވޭ ކޮންމެ އަނިޔާއަކީ އަޅުގަނޑަށްވެސް ދެވޭ އަނިޔާއެކެވެ. ކުރެވޭ ކޮންމެ ތަޢުރީފަކީ އަޅުގަނޑަށްވެސް ކުރެވޭ ތަޢުރީފެކެވެ. މިއީ އަޅުގަނޑު ލޯބިވާ ކްލަބެވެ. އެންމެ ކުޑައިރުން ފެށިގެން ރައްކާތެރިކަމާއެކު ބޮޑު ކުރި ދަރިއެކެވެ.

މި ކްލަބްގެ އަހަރީ ދުވަހަކީ ކޮންމެ އަހަރެއްގެވެސް ޖެނުއަރީ މަހުގެ ފުރަތަމަ ދުވަހެވެ. 2013 ޖެނުއަރީ 1 ގައި ފާހަގަ ކުރެވޭނީ ކްލަބްގެ ފަސްވަނަ އަހަރީ ދުވަހެވެ. އެެހެން ކަމުން މި އުފާވެރި ދުވަހުގެ މުނާސަބަތުގައި ކްލަބްގެ އެންމެހާ މެމްބަރުންނަށް ތަހްނިޔާ އާއި މުބާރަކްބާދީ ކިޔަމެވެ. އަދި ﷲގެ ހަޟްރަތުގައި ދުޢާ ދަންނަވަނީ މިކްލަބަށް އަދި ކެންދޫއަށް އިތުރު ފާގަތިކަން ދެއްވުމަށް އެދި.